عدّيت الأيّام... وهيبة قويّة

صورة من ملتقى محمّد البشروش بدار شعبان الفهري 
نوفمبر 2022،،، وهيبة قويّة

 

عَدِّيتْ لَيَّامْ بِالصَّبِرْ

وِطْوَالْ عْليّا عَدّْها

وْعَدِّيتْ اللّيالي بِنْجُومْها

نِبْنِي صْرُوحْ لَحْلامْ وِنْهِدّْهَا

وْعَدِّيتْ مْسَافاتْ وِبْرُورْ

مَا عَادْ لِخُطْوَاتِي مْداسْ وِنْمِدّْهَا

أَيّامْ الرّبيعْ مْنامَة وِصْحِيتْ

وْمَا لْقِيتْ في خْريفِي ضِدّْهْا

وِاللّي يِتْلَحِّفْ بِالأيّامْ

يِتْعَرَّى مَهْمَا يْحَاوِلْ يْشِدّْهَا...

وهيبة قويّة

من حكاية صدفة

نجمات... مقطع من حكاية صدفة، وهيبة قويّة

نجمات:

وعوّدها اللّيل بالهديّة

نجوم تزها بيها حياتها

صارت كلّ ليلة مستنّيّة

تغنّي على ضوّ نجماتها

تشوف النّجمة وردة جميلة

وصار اللّيل في عاداتها

ساعاتو معاها دافية طويلة

جنّة تطفّي نار كواتها

وهيبةؤقويّة

من حكاية صدفة

باللهجة العاميّة

كان العمر... وهيبة قويّة

كَانْ الْعُمْرْ رْبِيعْ مْنَوِّرْ

وْلاَ حَالْ عْلَى حَالُو يْدُومْ

وْكَانْ الْحِلْمْ بَدْرْ مْصَوِّرْ

وِاللّْيَالِي خَالِيَاتْ هْمُومْ

وكان القلب...

وهيبة قويّة

العالية، السوق، أمام المقهى العتيق: الطولقي

يا ساكن القلب، وهيبة قويّة

 يَا سَاكِنْ الْقَلْبْ وِالْقَلبْ لِيكْ مْقَرّ

مهما طْوَالْ الْبُعدْ وْسَافِرْ بِيك السّفرْ

ثَابتة مْحبّتك في الرّوحْ

وانت للعينْ النّظرْ...

وهيبة قويّة

عاميّة تونسيّة

العالية في الذّاكرة

حكاية صباح،،، جزء من "حكاية صدفة" بالعامّيّة

حكاية صباح

فرحت بالصّباح اللّي ضوّى الكون

وقامت معاه النّاس زاهية وفرحانة

سئلتّو: " تنجّم تداوي قلب ممحون؟

وتواسي العين السّهرانة

تورّيها آيات الجمال بفنون

وتكشف أسرار الرّبيع المزيانة

وتحدّثني على اللّي يحبّ ويصون

وما يخلف الوعد وما ينسانا

تبعد على البال كلّ الظّنون

وتنسّيني حبيب جفانا؟"

ضحك الصّباح ورّاها أنوار تلالي

وغطّاها بنسيم وعطر من ورود حالمة

قاللها:" إنت كيفي وحالك كيف حالي

ومن ليعة المحبّة ماكش سالمة

شوف النّور اللّي عندي وورودي وجمالي

وشوف الشّوق تصير فاهمة

اللّي يعشق المحبّة في قلبو تلالي

يسهر اللّيل على النّبض وانت العالمة"

كلامو هذا غريب عليها

احتارت : " هو يقدر يسهر اللّيل؟"

ياليت يزيد يورّيها

ويعطيها على كلامو دليل

سئلتّو والدّمعة في عينيها:

"انت يا صباح تحبّ وتميل؟

عاشق كيفي وليعتك مخبّيها؟

وأنا اللّي ظنّيت مالي مثيل."

شمس الصّباح غيمة خفيفة سترتها

وتعدّات... ما قدرت تخبّيها أكثر

كيف تعدّات، زادت نار الشّمس وقّدتتها

شعلت في الصّباح بلونها المنوّر

زاد لهيب المحبّة عندو... فطنت بيها وعرفتها

وما نجّم الصّباح يسكت، فيسع قرّر

وباح بسرّ القلب، وحاول نارو يطفّيها

قاللها: "من مدّة نحبّك، عمرك تتصوّر؟"

وهيبة ڤويّة

من "حكاية صدفة"، عامّية تونسيّة

حكاية مع الماء... مقطع من "حكاية صدفة"، باللّهجة التّونسيّة: وهيبة قويّة

مقطع من "حكاية صدفة"، باللّهجة التّونسيّة:

هربت من الخوف اللّي فيها

جرات للواد تحطّ تعبها

سمعت الماء ينادي عليها

بصوت حنين ومعاتبها:

"هاربة من نفسك وإلاّ تلوّج عليها؟

مِدّ إيدك من مراية الماء قرّبها

نصافحو بعضنا وشوفني فيها

صورة جميلة ورسم كتبها

على صفحة صافية ما ليها

إلاّ قاري فطين كان جرّبها

عرف الصّدق اللّي جاري بيها

ومحبّة عمرو ما خيّبها

ولا خانها ولا تخلّى عليها

غير المواجع زاد قلّبها

في روح فانية هايمة بيها...

العشق مكتوب... والعقول سالبها"

لون الفضّة شعشع قدّامها

فرحت، مدّت اليد تصافح

أوّل ما حبّت تبلّغ سلامها

ولامست الماء في الواد الطّافح

رجفة قويّة سرات في كلامها

"غيثني يا ماء... الجسم طايح"

ضحك الماء، وخطفّ شمالها

 وحاطها محاصرها بالفاضح

وغمرها ومن كلّ جهة جالها

وما لقات كان الصّوت صايح

لحظات ثقيلة عليها تعدّات

شافت الموت ونْفسْها غايب

قاومت الماء على صفحتو طفات

رجعت الرّوح وبدات تغالب

لكن القوّة ضاعت وما لقات

كيفاش تخرج بجسم تاعب

وحبّت تتكلّم خانها الصّوت

وجا خافت ضعيف فاني

" يا واد قول لماك باش نموت...

قلّوا يحطّني على البرّ من ثاني"

غضب الماء... هدر... وعلا الصّوت:

" إنت ناوية تمشي وتنساني؟؟؟"

ما لقات قوّة تقاوم، ترخات

وسط ماء هرهار يجري غاضب

مزروب بالخطوة حاملها بثبات

ما عارفة لوين توصل بالمتاعب

حبّت تعرف ما قال من كلمات

ما شافت منها معنى ثابت

سلّمت أمرها للماء وعلات

صار الجسم يعوم كالقارب.

ولمست الماء بيد ضعيفة

والفكر شارد مهموم

حسّ الماء اللّمسات الخفيفة

هدا... وصار معاها يعوم

وتكلّم بعد الغضب بكلمات لطيفة

قاللها: "ما تعذّبش حبيب مظلوم"

ولامسها برقّة ومحبّة عفيفة

غمّضت العين وجاها النّوم

وحلمت بروح طايفة رهيفة

وهدا الجسم منها ما نجّمت تقوم.

حسّت راحة غريبة في جسمها سرات

وفي روحها المحتارة الهايمة

علا الماء ومعاه تعلاّت

في لذّة حايطة بيها وهي عايمة

وصارت تتغنّى بالآهات

اللّي كانت في صدرها كاتمة

وحسّت بالفرحة، لكن بكات

تحبّ تنسى أيّام قاتمة

وما طوالتش بيها الأوقات

حطّها الماء على البرّ سالمة

حلّت عينيها وتملاّت

شافت الماء بعيون حالمة

ينظر لساقيها اللّي تعرّات

حشمت وهبّت بسرعة قايمة

ولقات الدّنيا مزيااااانة... وزهات

وصارت لسرّ الماء فاهمة

قالتلو: "يا ماء إنت سرّ الحياة"

وعرفت محبّتو اللّي على صفحتو هايمة

ونسات علاش للواد جات

وروّحت بوهم فرحة دايمة...

~وهيبة ڤويّة~

عيد الحبّ... من "حكاية صدفة"

وفي ليلة عيد المحبّة جاها

متبسّم كالعادة يغنّي 
 قدّم نجمة وزاد هنّاها

قاللها : "شفت الحبيب مستنّي

ورداتو الذّابلة سمّاها

باسم الحبّ فاقت تمنّي

قلب مشتاق كان نساها

وفي لحظة تذكّر حَبّ يهنّي"

وقاللها : "الحبّ غدوة عيدو"

قالت: "عيد الحبيب كان كلّ يوم

مع كلّ فجر وردة في إيدو

يصبّح ويفرّح من قبل ما نقوم

ننسى الوجيعة والنّكدّ والهموم ما يفيدو

إلاّ لطول السّهر ولسفر النّوم"

وسكتت تنهّدت وقالت: "ما عيد إلاّ عيدو

ما اكثر في حياتي الهموم!

العين والقلب وما يريدو

يا ليت على وردات الغالي نرجع نقوم"!!!

.................

وتجمعت طيور الصّبح لمّا شافت

وردة حبيب الرّوح جات تهنّي

خذاها شذاها وعطرها كيف فاحت

صدّح بصوت جميل وبدا يغنّي

فارح بفجر جديد من مدّة ساكت

نشوان بعبير الوردة كان مستنّي

تفيق الورود من بعد ما ماتت

تُنشر الفرح والعيد ترجع تمنّي...

بأيّام تعود من شهور فاتت

وقت اللّي كان بيها متهنّي

~مقطع من "حكاية صدفة"،،، وهيبة قويّة~